Sefydlwyd Côr Seingâr yn ystod haf 2004, a buan iawn y lledodd y si am y côr newydd oedd yn y dre.

Sylwodd Nicki Roderick, Pennaeth Cerddoriaeth Ysgol Gyfun Maes-yr-Yrfa, nad oedd yna gôr cymysg yng Nghaerfyrddin ar y pryd, er y gwyddai fod yna botensial mawr mewn tref a chymaint o boblogaeth Gymraeg; “Ma’ tre’ Caerfyrddin yn gorwedd mewn ardal Gymreig iawn ond eto nid oedd gan y dre gôr cymysg ifanc,” meddai. "Ro’n i’n teimlo nad oedd rhywbeth yn y dre i’r bobl hynny, ond hefyd yn nabod llawer o bobl ifanc Cymraeg oedd â diddordeb mewn cerddoriaeth.”

Yn ystod y chwe blynedd ddiwethaf mae yna alw cynyddol wedi bod ar y Côr i ddiddanu cynilleidfaoedd Cymru a thu hwnt.

Erbyn heddiw mae gan Seingâr ryw 35 o aelodau.

Er taw i ddod ynghyd a chanu yw prif bwrpas côr o unrhyw fath, mae’r ochr gymdeithasol yr un mor bwysig â’r ochr gerddorol, ac yn hyn o beth dyw Seingar ddim gwahanol. Mae’r côr wedi llwyddo i fod yn fan ardderchog i ymestyn cylch ffrindiau ac ehangu bywyd cymdeithasol nifer o’r aelodau, fel yr ategodd Nicki; “Ma’ sefydlu côr yn creu cymdeithas yn syth. Ma’ nifer fawr o Gymry ifanc y dre yn nabod ei gilydd nawr a heb y côr fydden nhw ddim wedi cwrdd."